Орхон аймаг, Эрдэнэт хотод оршин суугаа иргэд та бүхэнд энэ өдрийн мэндийг хүргэе.
Орхон аймагт өнгөрсөн 2020-2023 оны хооронд 3 шинэ цэцэрлэгийн барилга, 3 цэцэрлэг, 1 сургуулийн өргөтгөл, нийт 7 барилга, байгууламжийг ашиглалтад оруулж, боловсролын хүртээмжийг нэмэгдүүлсэн бол өнөөдрийн байдлаар шинээр баригдаж буй 4 сургуулийн барилгын ажил үргэлжилж байна.
Аймгийн Засаг даргын Тамгын газар, Боловсрол, шинжлэх ухааны газартай хамтран багшийн хөгжлийг дэмжих “Багш” хөтөлбөр, иргэд, хүүхэд, залуучуудын эх хэлний боловсролыг дээшлүүлэх “Эх хэл-Эрдэнэт” хөтөлбөр, хөгжлийн бэрхшээлтэй хүүхдүүдийг боловсролд тэгш хамруулах “Тэгш боломж” төсөл, сургуулийн насны хүүхдүүдэд эрүүл мэндийн боловсролыг шинэлэг хэлбэрээр олгох “Эрүүл хүүхэд” төсөл, сурагчдад урлаг, спорт, гоо зүй, технологи, амьдрах ухааны боловсрол олгох “Хүүхдийн хөгжил” төсөл зэрэг орон нутгийн онцлогтой шинэлэг төсөл, хөтөлбөрүүдийг амжилттай хэрэгжүүлэн ажиллаж байна.
Дээрх ажлуудын үр дүнд Боловсрол, шинжлэх ухааны сайдтай аймгийн Засаг даргын байгуулсан гэрээний хэрэгжилтийн үнэлгээгээр 2022, 2023 онуудад Орхон аймаг бусад аймгуудаа тэргүүлж, боловсролын салбараа хамгийн сайн дэмжиж, хөрөнгө оруулалт татсан 6 аймгийн нэгээр шалгарч, манай аймгийн Боловсрол, шинжлэх ухааны газар 2023 оны гүйцэтгэлийн төлөвлөгөөний биелэлтээр “Маш сайн” үнэлгээ авсан 5 аймгийн нэгээр шалгарсан зэрэг амжилтыг үзүүлээд байна.
Боловсролын салбарын төсвийн шинэчлэлийг хэрэгжүүлэх, багш нарын ачааллыг бууруулж, ёс зүйг дээшлүүлэх, хүүхдийн нийгэм, сэтгэл зүй, танин мэдэхүйн хөгжлийг дэмжих, боловсрол эзэмшихэд тулгарч буй бэрхшээлийг арилгаж, сурах тэгш боломж бүрдүүлэхэд хамтран ажиллацгаая.
